ممنوع عبور المشاة.. قصيدة محمد خالد الشرقاوي في ملتقى بيت الشعر العربي

يستعد بيت الشعر العربي، بإدارة الشاعر سامح محجوب، لإطلاق الدورة الثانية من “ملتقى بيت الشعر العربى للنص الجديد”، وذلك خلال يومى 2 و3 مايو، فى إطار استكمال التجربة التى حققت حضورًا لافتًا فى المشهد الثقافى خلال دورتها الأولى.

ممنوع عبور المشاة لـ محمد خالد الشرقاوي
امبارح…
شوفْتني ف ميدان الدنيا بعدي الشارع.
كان شكلي غريب..
وكأني عجوز أو طفل ف أول يوم يتعلم فيه المشي.

وتخيل…!!
تفضل بارد ولا يتهز الدم الجامد جوا عروقك
لما تشوفك فجأة عجوز
لسه على رصيف الشارع من ساعة
بتفكر وتفكر، وتبُص شمال ويمين
وتنَزِّل رِجْل وترفعها،
وترجع تربط روحك ع الجسر بلهفة
قبل ما تنزل بحر الشارع.

وبترفع إيدك باستنجاد زي الغرقان وتشاور
وكأنك بتصحي الإنسان الميت
ف قلوب أصحاب العربيات العايمة في مَجْرى الشارع.

معقول!!
بتسيب إنسان قدامك
في مهمة بتحتاج فرد أخصائي عبور شارع مع كل مواطن،
لمجرد إنك واقف بتفكر إذا كان الشخص ده
ــ أنت بجد ومن زاوية بعيدة
ــ وَلَّا مجرد واحد شبهك ف الأحلام والخوف والعجز
بس على كبير.

عايز تثبت إنك مش هو؟!
ف جميع الأحوال
هتشم حياتك ف هدومه لما هتجري عليه ف نهاية المشهد،
وقبل ما هتقوله نصايح،
هيقول لك.. إنه لا بد يعدي شوارع وحده

ده لأن الشارع..
حرب كبيرة وفيها معارك ومُناورات مفتوحة
والحرب دي إيدك ولسانك
همَّا سلاحك في الآخر والأولْ
الشارع شر بيتجدد ومالوش رادع
غير فرض قرار حظر تجوِّلْ.

وعبور الشارع له حكمة
كن قلب شجاع ف مواجهة صاج وحديد العربيات،
واتعلم فن الحرب ومهارات تلزمها:
تبدأ بمواجهة.. بعدين هترَاوغ وتْنَاوِر،
ف الآخر.. هتفوز بهروبك.
ف الوضع ده لو تنجح ف هروبك،
تبقى نجيت من صاج وحديد وبلاستك طاير ع الأسفلت.

معقولة في جسم بيجري ف خراطيمه الدم،
يواجه كائن يجري البنزين جوا عروقه؟!!

أما إذا كنت تحب الواقع
من أنصار العمر دا واحد، وإن راح منك مش هيعود
يبقى سامحني لا بد تقف ف مكانك هنا صامد ومتين
وأكيد هتْطول الوقفة سنين
بس هتيجي لحظة حق مُبين
هتعدي الشارع بسلام، زي الإنسان
بعد ما هتبص كويس تاني
شمال.. ويمين.